ദേളി: ഭദ്രാവതി പള്ളിയിലെ ഖത്തീബും ഷിമോഗ തീര്‍ത്തഹള്ളിയിലെ സാറാ-മുഹമ്മദ് ദമ്പതികളുടെ മകനുമായ അഷ്‌റഫ് സഅദി (25) കഴിഞ്ഞ ദിവസം രാത്രി ഷിമോഗക്കടുത്ത് ഉണ്ടായ വാഹനാപകത്തില്‍ മരണപ്പെട്ടു. അദ്ദേഹം സഞ്ചരിച്ചിരുന്ന ബൈക്കിലേക്ക് എതിര്‍വശത്തു നിന്ന് വന്ന വാഹനം ഇടിക്കുകയായിരുന്നു. കൂടെ ഒരു സുഹൃത്തുമുണ്ടായിരുന്നു. അദ്ദേഹവും മരണപ്പെട്ടതായാണ് വിവരം ലഭിച്ചത്. ഏപ്രില്‍ മാസം അഷ്‌റഫ് സഅദിയുടെ കല്യാണം നിശ്ചയിച്ചിരുന്നു. കല്ല്യാണം ക്ഷണിച്ച് തിരിച്ചുവരുമ്പോഴായിരുന്നു അപകടം.
സഅദിയ്യയില്‍ നിന്ന് പഠനം പൂര്‍ത്തിയാക്കി കഴിഞ്ഞ 42-ാം സമ്മേളനത്തില്‍ ബിരുദം വാങ്ങി പുറത്തിറങ്ങിയ നവ സഅദിയാണ് അദ്ധേഹം. പഠനത്തില്‍ മിടുക്കനും ഉസ്താദുമാര്‍ക്കും വിദ്യാര്‍ത്ഥികള്‍ക്കുമിടയില്‍ വളെര പ്രിയങ്കരനായിരുന്നു. അബ്ദുറഹിമാന്‍ മുസ് ലിയാര്‍, ഹംസ, അബ്ദുല്ല കുട്ടി, മുഹിയിദ്ധീന്‍, ഹബീബുല്ലാഹ്, സുബൈദ, തുടങ്ങിയവര്‍ സഹോദരന്‍മാരാണ്. മരണവിവരം അറിഞ്ഞ് സഅദിയ്യയില്‍ നിന്നും ഉസ്താദുമാരും കുട്ടികളും ഷിമുഗയിലേക്ക് യാത്ര തിരിച്ചിട്ടുണ്ട്.
അഷ്‌റഫ് സഅദിക്കുവേണ്ടി മയ്യിത്ത് നിസ്‌ക്കരിക്കാനും പ്രത്യേക പ്രാര്‍ത്ഥന നടത്താനും സഅദിയ്യ ജനറല്‍ സെക്രട്ടറി കെ.എസ്. ആറ്റക്കോയ തങ്ങള്‍ കുമ്പോല്‍, ജനറല്‍ മാനേജല്‍ എം.എ. അബ്ദുല്‍ ഖാദിര്‍ മുസ്‌ലിയാര്‍, പ്രിന്‍സിപ്പാള്‍ എ.കെ. അബ്ദു റഹിമാന്‍ മുസ്‌ലിയാര്‍ എന്നിവര്‍ അഭ്യര്‍ത്ഥിച്ചു.
No comments:
Post a Comment